يصب الكاس بعد الكاس

@ تذكرني نجوم الليل لمعة عينه الحلوة
# وبرد الليل شوّقني أكون بحظنه الدافي

@ انا شوقي يهدّ الحيل وصبري زادني بلوة
# وتعجز ريشة الرسام ترسم كل الاوصافي

@ لو ان الحب يتكلم يقول انه لي السلْوَة
# وانه بلسم جروحي وانه خلّي الوافي

@ محبتهم تعلّمني أشوف الناس من عِلوَة
# واجافيهم ومعذورن حبيبه لو بدا يجافي

@ يفزّ القلب من طاري جماله فزّة الفلوة
# ولاشفته احسب انه حمامة حبْ رفرافي

@ انا أفداه بعيوني وقلبي وكبدي و(كلوة)! !
# واحس انه طبيبي لن بعده قمت متعافي

@ ألا ياريح هذا هو شبيه الغصن رح إلْوَه
# تعللّنا على حبه وربي وحده الشافي

@ على كثر الزحام اليا أشوفه كنّي في خلوة
# كأني مع حبيبي حقْ ، وكل الناس أطيافي

@ وشفته وآنا من شفته احس العين في جَلْوَة
# وبعض الزين له هيبة تراعد منه الاطرافي

@ وكلما قلت انا ضامي سقاني كاس من دلوه
# يصب الكاس بعد الكاس ونا لا “بس” ولا “كافي”


أخوكم
بياع الورد

كتبت في 22 أكتوبر 2008م