الوقفة الي جاتني بآخر الوقت
وقفة , ولكن بعد تكسير الأقدام
صحيح انك تاقف لناس لا رِقت
والا ترا وقفتك ماهيب إقدام
المرجلة ماهي في كم تصدّقت
المرجلة لاصرت اتزور الأيتام
وتدور الي ماقدر ينطق بـ: ضِقت
العِفة ألي صارعت جور الأيام
دامي على وضع العفاف وتطرقت
أذكر ترا لك جار يبكي من العام
انت الذي لااشتقت ماقلتها اشتقت
تشري على شوقك لذيذات الإطعام
وانت الذي لا جابك الهم واطرقت
الهم صار بسبّة أنغام وأحلام
يا كم أحرقت المشاعر وأحرقت
لاصرت ماتفهم قوانين الإكرام
يا كم عفيف ويشهق ان كان مشهقت
لكن شهيقه يرفعه وقت الِقيام
يدعي: أيا ربي لبلواك انا طِقت
يالله ترحمني وتغفر لي آثام
سوق القدم فيهم عسا كل ماسقت
يسوق لك ربي من الخير أنعام
ماقد نقص من مالك ان كانك انفقت
في الخير إلا أبشر بكثرها تام
6-2-2017
خالد علي الكثيري
ماعاد فيني خلق لعتاب هـ الناس
من غاب غاب ومن يجي ياهلا به
قلبي وكل الي تناصوه جلاس
أحباب واصحاب واهالي وقرابه
نبرد على ذكر الميامين هالراس
ونجاور الغالين ملح وذرابة
دنيا على ماقيل من باس لاباس
تصفا ولكن في صفاها غرابة
ترفع رخوم القوم عن كل الأجناس
والي على الهقوات محدن درابه
دنيا تعزّ ارخوم وانذال واِخساس
والظالم الي وسط قلبه خرابه
الله فيهُم يبتلي طيّب الساس
حِكمة , وتلقى حكمته في ذبابة
اصبر , وأجرك لو على جرح الإحساس
وان ضايقوك ادعي , ترا ذاك بابه
يسمع أنينك لو على جرّ الأنفاس
وتوعّد الطاغين بالإستجابة
والياس ماهو من كرم ربّك الياس
الياس لما تحتويك الكئآبة
وتصير فيما بين هالناس محتاس
خص الزمان الي بليّا مهابة
هذا زمانك يالذي ترفع الكاس
وهذا ترا ماهوب وقت الصحابة
لاتامن المقفي ترا الوقت عكّاس
والسيل ماياتي بشوف السحابه
اقبض على دينك من أيّات وسواس
وارجع لمن هو خالقك من ترابه
واحذر تماشي من يناديك بأجراس
أحيان تحتاج الدعاية لطِلابة
وافتح مجالس قلبك لكل هالناس
من غاب غاب ومن يجي ياهلا به
5-2-2017
خالد علي الكثيري
