ردود شعرية مع الشاعر محمد بن طالب

ردود شعرية 

ردود شعرية قديمة , بيني وبين الشاعر الكبير 
محمد منصور بن طالب 
حيث تحرّشت به وارسلت له اولاً مبادرتي 
وكان هذا الحوار الشعري الجميل :





خالد الكثيري:
ناديت وينك أبومنصور ياويلك
ولّم رجالك تراني جيت برجالي

جيتك وشفني تراني جد ّفاضي لك
عطنا قصيدك اذا تقدر على نزالي


محمد بن طالب:
لبيت كلي وقافي جاك يمشيلك
ماادمت رايق وهذا الوضع يحلالي

تقول فاضي وتحسب ماني فاضيلك؟؟
قرب قدوعك وانا باقرب دلالي



خالد الكثيري:
يازينها دلة(ن) فاحت على هيلك
من طيبها ماتوقّف هزّ فنجالي

تسحن على بنّها فرسانك وخيلك
في مجلسن ذاك غالي ثم ذا غالي

محمد بن طالب:
يا مرحبا بك عدد ما يبرق مخيلك
على القوافي ويضوي (ربعها الخالي)

شعرن كتبته على طاروق تفعيلك
فيه التحدي وفيه الحرف متعالي

خالد الكثيري:
زيِد التعالي وانا بازيد باشيلك
نرقى الطويلات محمولن وحمّالي

ترا الثريا ثريّاي ولك سهيلك
أما البدر اختصاصك يامنى حالي 

محمد بن طالب:
ياحليل ردك علي وانت يا حليلك
جبت المفيد وضربت المر بالحالي

ياولد عمي ترى هالقلب صافيلك
تعال واسمع قصيدي ولحن موالي


خالد الكثيري:
قالوا العواذل ترا كثّرت مدحي لك
 لا مادرو قدرك بمليون رجّالي

شاعر تغني لك الأيام وتبكي لك
بالقاهرة صفقو لك والبدر عالي

خوفي اذا جبت (اتلحلح) بـ (شدحيلك)
وتعيّر الكبسة وتمدح بفوّالي

لا الأرض أرضك ولاذا النيل هو نيلك
 لاتحسب البنطلون بمستوى عقالي


محمد بن طالب:
طول غيابي وابيك تشييك ايميلك
ارسلتلك شين يبرد خاطري وبالي

بالمختصر اقرا وقرب منك منديلك
لانك بتبكي وتردد ليل يا لالي


خالد الكثيري:
مرسالك اللي تأخر من غرابيلك
لا انت اللي أرسلته ولاهو لي جالي

الظاهر انك مصدق اني باكي لك ؟
ببكي إذا قد بكى بوزيد لهلالي ! !! 


محمد بن طالب:
اليوم ياصاحبي بحكي و بـشكيلك
بسًمعك حاجه واحكم عقبها تالي

واحد تعزه وتصفاله ولا صفيلك
قلي شسوي فقدت المر والحالي


خالد الكثيري:
حتى لو انه صفا , هو صدق صافي لك ؟
 هذا زمان المصالح يابري حالي 

خليتهم كلهم , ماعاد بحكي لك
 قصّيت مفتاح قلبي وسط ميدالي 



من روائع عام 2009م 

فك الرواق و شد

فك الرواق وشدّ ترا كل البدو شدّو
................... لومايطيع الوقت قله سمعن وطاعة
من كنت تبغاهم عشا سبقوك وتغدّو
................ واللي يكيل على البشر كالوه من صاعه
لاترتجي من هم تخاوو دونك وصدّو
................... ماكل مرباعن له المخماس مرباعة
لاما تمدّ يدينك إلا أنّهم مدّوا
................... واقنع ترا الدنيا مع القنّاع منصاعة
عدّ الغلط فيهم وهم من قبلك وعدّو
................... ماقد تخاوت نفس خير ونفس طمّاعة
حدّيت في صوتك وهم في صوتهم حدّو
................... غابة أسود وحاسها فهدن مع ضباعه
كدّيت وتحسب غيرك اللي ما أبد كدّو
............ يعني خلاص أنت الوحيد أللي على الطاعة ؟
( إن كنت ريحاً ) هم ترا بإعصارهم جدّو
.................. وان كنت ناوي مشكلة هم بيّتوا الراعة !
عدّو أعاديهم وقد طمروك وماعدّو
...................... ماكل سيوف السوق لمّاعة وقطّاعة
بعض السحب تمطر ولابرقن ولارعدُ
................. بعض السحب في عجّها والبرق سمّاعة
ياخاطري هذي القوافي أو كما يبدو
................... وصف العنيد وهي بعض مو كامل اطباعه



أخوكم


كُتب في 11 مايو 2008م 

يا ساحر بزينك !!

ياســـاحر بـزينـك

عطني مـوازينـك

دوّرني في عينك

@ تلقــاني ذوبان @



خبرني عن حالك

اسمي على بالك

لاتنسى من جالك

@ ولهان وعشقان @




يعجبني تصويرك

غنّت عصافيرك

يوم انتـثــر خيرك

@ لا إنس ولاجان @




قلبي أنــا راضي

وبغيــركم فــاضي

ومن العشق قاضي

@ يا فـــل مـزيــان @




لاتحرق الفرحة

وتميّل الطرحة

بجيّتـك مـرحـــا

@ والرمش فتّان @




يومي معك فَلّة

بقرب هالطلّة

من ريقكم والله

@ عطشان عطشان @




دوم انت في بالي

ماغيركم غالي

وبكم هنيّــالي

@ يـا ميلـة البـان @

من قديم قصائدي
التي تغنى بها بعضهم

عضّها ياذيب

عضّها ياذيب



ياقلم أمجادهم وقّّف , مدادك قد قضا
............... ما بعد أمجادهم أمجاد , قدها قــاضية

والعمايم ماتجي بالغصب لو ماهي رضا
............ غضّت عيون(ن) على شوف الخطا متغاضية

من توسد في بنا مستقبله شي ٍ مضا
................. قد يجافونه نفوسن قبل كانت راضية 

عضّها ياذيب لا ألفيت وقت العضعضا
.................. خلّك الوافي المصافح للأيادي الواضية

من يدق الخيم والعيدان فيها مرضْرضا
................. لايحسْبنّه تظلل في الشموس اللاضية

من يشبّ السمر ماهو مثل شبّاب الغضا
............. كم عقول(ن) نيرّة جابت عقول(ن) فاضية !

والسلاح إليا تقادم صاب قنّاصه شظا
.................. والسيوف الماضية ماهي بدايم ماضية

وش بلا من هيّج ركابه وهي متربّضا
................. وش بلا من عيّب اللي بالجدايل عاضية

هي على قلة عقول(ن) أو على زود الفضا
............. أو حسود(ن) غاضته قلوبنا المتراضية



كلماتي

22 رجب 1429هـ 

عنتر زمانك

قصيدة كتبتها
فيمن اعتاد ايذاء أقرباءه
وتخصص في التنكيد عليهم
واعتاد أن لاتكون عنتريته إلا في هكذا مجال

عنتر زمانك ياحبيبي لاتحسب انك قوي

.................. لقويا في هالزمن اللي تحدو هالصعـاب

ياما تقوم النايبات وانت فيها منزوي

................... المشكلة لاقد توهّمت انك الذيب المهاب

الذيب لامنه عوى يجاوبه ذيب يعــوي

.................. لكن تعال وفسرّ الذيب اللي تاكله الذياب

لاهي على قِلّ احترام ولا على عقلن سـوي

............. ترمي على الناس التراب واخره تاكل تراب

لا ما سِلِم منّك قريب ولاسلم منك خوي

................... والحالة اللي فيك ماظنيتها بس اكتئاب

أشهد بأن الضيف عندك ينزل وبطنه خوي

.............. ماحشّم اللي قد نصو بيته وهم بيض الثياب

أحيان تتعجّب من اللي دوب تسمع له دوي

................ مثل البراكين وحممها والزلازل والشهاب

والسيف إللي رافعه ابطول عمره ما هوي

................... إلا على ثوبه يسلّه لابدا ضرب الرقاب

مدري أهو الطبع احضري والا على طبع ابدوي

............... والا على طبع البشر مخلوط ابطبع الكـلاب (كرمتو)

العنترة ماهي تقويّ ثم تشهير الذوي

............. ماهوعلى دمّ القريب تجيب ضبعك والغراب

العنترة انك تذود لولد عمٍ مكتوي

............... واليوم نطرد في حمانا مثلما طرد السراب

الله ياعالم بحالي يالحليم ويالقوي

................. اكسر خشوم العنترية خلّها تحت التراب

من قديمي 2009م 

من قفص إلى قفص

من قفص ينتقل الذلّ الى ذاك القفص
وأنـا في قـَدَرِي أبــرحــنـي ذاك المغــص


وعــلى قــبر طـمــوحي كتـبو أغنـيةً
ورمى عُـمّتـه شيـخي وغـنّى ورقــص


وأنـــا مسجــد عيـدٍ كســروا منبرهُ
وعلى المنــبر شيــخٌ معهُ أتعسُ نص


ألـَهــم أجـــمـل وردٍ ولـنـا شـــائـكهُ ؟
ألـَهــم فـرشُ حـريرٍ ولنا مفرش بحص؟


واذا تـشكو إليهم نصحوا في وجلٍ :
هكذا الخير من اللهِ حظوظٌ وحِصص


سَخِروا مـــن ألمي بــل شـربوا كل دمي
بل جعلوا من كل آمالي خيالاتُ قِصَص


و قيـــودي بعـد أن دار عـليــها زمــــنٌ
بـــدّلوهـا بقيودٍ ولها حدُّ مقصّ


وعلى كـاهل ظـهـري حمـلوا قـافـلةً
وعلى تاج إبائي سـرقوا أجمـل فــص



من شوارد قصيدي التي نسيت أنشرها في وقتها
25فبراير 2008م

ليتهم ما بشّروني

كل فرحة ...
مثل احلامي ونومي
مثل ذاك الي غسل وجه وقام 

بشروني لين قامت بي عزومي 
ليتهم ما بشروني بالكلام

الحزن أضحا أساسن في علومي
غارقن في دنيتي وسط الزحام

ماجمعت بدنيتي الا همومي
كثر ماشفت بحياتي من ملام 

انغبنت بطيبتي . ضاعت علومي
غبنة الي يصلح باهل الخصام

لاتحاوته البشر كلن يلومي
بعدما جاهم على طبع الكرام

#كلماتي 
خالد علي الكثيري

لابوعيشتي

هذي يدي ان كان مديت إيدك

:: وهذا انا قدامك ان كان قابلت

وقت الرخا بتشوفني ثوب عيدك

:: وفي وقت شدّات البلا جيتك وشلت

بسقيك من وِرد الغلا بل وازيدك

:: واذخر لك ازنادي ليا وقتنا فَلت

واصير لامال الزمن فيك حيدك

:: لا قلت لي ياصاحبي شوفني مِلت

ما غمضت عيني ليا شفت قيدك

:: ماعشت لابوعيشتي وين ماقلت

 دمي جرى لكن جرى في وريدك

:: ودموع عيني قالت: بخدكم سلت

 كلما قواني وقتي وجيت افيدك

:: تسعد بي اللحظة على قل ما نلت

كلماتي

خالد علي الكثيري