على ذكرى حبيبي

على ذكرى حبيبي قمت أغنّي :: واسولف للنجوم اللي بسمايه

واقول انت الوتر والحب فنيّ :: حمانا الله من اهل الوشايه

حبيبي بســألك عنـك وعني :: انــا قلبي معــك والا معـايه

بـلاي عيونك اللي قد خذنّي :: وخــدّ الورد لامسـت شفايه

وخصــرن لاتمـايل به فتني :: تهــادى لين ضيّع لي هدايه

على خُمر الجـدايل لا رمنّي :: هددها ماتـركني في عنــايه

سرا بي حال إن ماخاب ظنّي :: عجز طب البشر ياصف دوايه

أبات ودمــع عيني بــارحــنّي :: وما للدمـع غيـر الحـب غـايه

كلماتي

اخوكم



خالد علي الكثيري
9 سبتمبر 2012م

ماعاد سلّاني التليفون والشات .. !

جيتك ..

جيتك وشوقي للمسافات زادي :: ماعاد سّلاني التليفون والشات

لانّك بهذا الكون شي غير عادي :: ترمي على قلوب المحبين علّات

ثم تكتفي وانت بحياتي مرادي :: من بعد ماشفت العنا منك بالذات

كلما بغيتك قمت اهوجس وانادي :: واسمع صدى صوتك تكاسير وصْلات

والثم جبين الورد يافل كادي :: واطفي من اشواقي على كلّ مافات

جيتك حبيبي ، والفرح صار بادي :: من يوم خليتك وانا متّ بسكات

جيتك قوافل شوقي بصوت حادي :: حتى الضما ترويه ذكراك مرّات


جيتك ..

وانا ودي بضمّ الأيادي :: ودي تنشّق من ثناياك نسْمات


وسلامتكم

أخوكم

خالد علي الكثيري
9 سبتمبر 2012م

قل للمواجع لا بدت .. هيه! زيدي !!

عطني قصيدك قبلْ تسمع قصيدي : :
……….. : : واعطي حياتك شي من راحة البال

قل للمواجع لا بدت .. هيه! زيدي! : :
………… : : خَلّك على الله واسأله يصلح الحال‎‫

كل الرجا أبدا واغنّي نشيدي : :
……….. : : والشمس تشرق من بعد ليل قد طال‎‫

من ضيقتي ضاقت دماي بوريدي : :
…………… : : ماعاد في ليل الهوى أي موّال

ياعتمة قلوب البشر وش تريدي : :
………. : : يكفي وجرحي من عنا الضيق قد سال

غنِّي على ذاك الزمن ثم عيدي : :
……………: : سبحان ربي مغيّرن كل الأحوال

بقلمي
أخوكم

خالد علي الكثيري

بس كذا .. إحنا انتهينا

فضفضة قلم - خربشة قلب ..

وش علينا ..
~

ناس ما تسأل علينا

~

بعد مارحنا وجينا

…

~
وفي غلاهم قد سعينا

وش علينا ؟

~

ما نسينا ..

~

بعد كل اللي ابتدينا
مانسينا ..

~

وش هو غيرّهم علينا ؟

~

مادرينا ؟

~

وش حصل وش صار فينا ؟

~

ضاع كل ألي بنينا ؟!

~

و
بإختصار
و بكل بساطة
~



احنا
مع بعض ( انتهينا )

~

بس كذا ..
~
احنا انتهينا ! !



من كلماتي

خالد الكثيري

ماعاد بي روح - لأرواح الأطفال شهداء مجزرة الحولة

يللي قتلت الروح ماعاد بي روح …………..
……………. وش عاد خليّت بضلوعي مكانه

زدت الذي فيني من جروح بجروح …………
………….. وازريت ألقى شيّ(ن) أقبل رهانه


دمّ العرب ياسيدّي دوم مسفوح ……………..
……………….. دام العرب دايم يبون الإهانة

تمشي مذابحنا ولا تسمع النّوح ……………..
……………… والموضه اليوم المذابح خيانة

مابيننا عادي ولا جيشه يلوح ………………..
…………………. هذي عروبتنا بدون الديانة

وأكبر جريمة صارت بطفل مملوح …………..
…………….. من قال أرواح الطفولة أمانة ؟؟!! !

هذي طيور الشام للجنة تروح ……………….
……………….. دام العرب أكبر غضبهم إدانة

 


- من قصيدي / لشهداء الحولة
ستبقى في الذاكرة مجزرة 25/5

أخوكم

خالد علي الكثيري

ترا إنت إدمان !!

قصيدة كانت من مجرد بيتين شعر جت في بالي بعد (خوقاق) ما كان في محله (:

, ولولا تشجيع أخي الشاعر خالد يوسف وإلا لم أكن أفكر بإكمالها





أنسى حدودي , وابتدي بالغشامة !!

لا صرت قدامك وانا حيل .. ولهان

طفل وتعدى في حدوده كلامه

وأبعد أمانيه .. ؟

يمضغ له إلبان

والقـــول ما ميّز حلاله حرامـــه

هذرى حبيبن من محبتك سكران

والفكر يعلن في خضوعه زحامه

مزحوم من شوقه

وش عاد لو كان؟

لو كان قلبي في ضلوعك حمامه ؟

في الروح عشّي !

وانت يازين .. ( سجّان !! )

اتعــاقدت فيني عــلوم الفهامة

والفلسفة صار سواليف عميان

اسمح لخلن لاتجاوز غرامه

معذور من شافك ترا أنت ؟؟؟؟؟؟ .. إدمان !!

انت الجمال اللي يزوده لثامه

( سكر تلبّس في غطا كله ألوان )

لك شامتن ماظن مثل اي شامة

لك قامتن بكّت مِنِ غصونها البان

طقّمت بعيونك رموش الفخامة

وتكمّلت لا شفت مبسمك رمّان

حتى القـمــر لا طلّ الكلّ لامــه

ارجع مكانك !! لاتجي الغلا بان




يعني تحملني اذا صرت خامة

تعلى على كل البضايع والاثمان

مختوم بالجــودة وختمـك علامة

ماجابته لا بنت من إنس أو جان




أخوكم

خالد علي الكثيري
- بياع الورد -

مجاراتي لمحمد بن فطيس - منشورة بالصحف القطرية

هذه الأبيات كانت

مجاراة لأبيات الشاعر محمد بن فطيس

لوّ الدموع تفيد فادنّ الأيتام
لوّ الكلام ايفيد عادت فلسطين

ولوّ النبات اتطلّعه دمعة هيام
شفتوا على خدّي ورود و بساتين
-




أبياتي تقول :

و اتكــــاثرت مابين أوجــاع وآلام
يا كيف صبرك يالحشا لين ذلحين

جـمّـــعت هميّ ثــم كوّمــت أكوام
حطيت فوق جروح حبي, عنا الدَين

سجلت قصة جيل ماشدّه احزام
وكبار ضاعت من وراهم ملايين

زد فوقها جرح العروبة على الشام
ماعاد خــلاّ باقي جروحي تــبين

وتم نشر مشاركتي في صحيفة العرب القطرية
بصفحة ملفى القصيد بمشاركة نخبة من الشعراء ، في فقرة المجاراة الشعريةلأبيات بن فطيس ، وكان بالصفحة كذلك فقرة رومنسيات ، وعمود دقة باب ، وزاوية الخواطر.

رابط الصفحة بصيغة صورة

http://www.m5zn.com/uploads2/2012/3/19/photo/031912120321p5km17rgd9q.jpg



رابط الصفحة بي دي اف

http://www.alarab.qa/upload_ar/pdf/files/1234362987_A19N%2023.pdf

كل التحية لكم

أخوكم

خالد علي الكثيري

تكفى خذ اعيوني !!

لا صرت ياقلبي تبي تطلّ وتـــروح
…………… تكفى خــذ اعيوني مع كل طلّة

وش عاد لي بالعين وش عاد بالروح
……………. دنيــا بدونــك يا حبيبي مذلّــة

أتعبت نفسي وامتلا قلبي اقــروح
…………. والنــاس من حــولي أخلّه أخلّه

كنت الصدى ياخلّ في لحظة البـوح
………….. كنت المعاني في سطور المجلة

كنت الوريف الظــل يا عالي الـدوح
………… كنت المسا : نسما ونجوم وأهلّة

كنت اللقا بجمـــوح مابعده جمــوح
…………. كنت الــدوا لألفين عـــلة وعـلة

كلما طريتك ابتدت فيني جــــروح
……….. أذكر معاك أيام واللــــــــه فلّة !!!

واذكر ظروف الوقت لاصابها شحوح
…………….. كلما قسى قيدي تجيني تحلّه

وينك تعلقني ؟ على كيفك تروح ؟
…………… مــاحلـلّــوهــا لا ولا بيّ مـلـّــة

بس لابغيت تطل ياخل وتـــــروح
…………… تكفى خــذ اعيـوني مع كل طلة !

- قصيدي -

محبكم

خالد علي الكثيري
- بياع الورد -

محاورة شعرية ( بن سند و بن سعيد )

محاورة بيني وبين الشاعر الكبير ( رشيد بن سند )

والذي دائماً يمتعني بالتحدي الشعري بعدة ألوان تثري الملكة الشعرية لديّ وتدل على قوة الملكة الشعرية لديه كعادته متألقاً عندما ينظم

دخل هذه المرة بلون شعري رائع أترككم مع ماقال والردود التي حصلت بيننا :

( توقيت المحاورة .. إجازة المدارس التي كانت قبل اسبوعين تقريباً )

@ رشيد بن سند :

سلام يالشــاعر المــقــدام
تســليم جـاكم على السنّــة

في الملـعـبـه منزلك قــدام
تعـــرف تعــاليــمـه وفــنّه

# خالد بن سعيد :

أهلاً هلا صايد الضرغـام
يا كــاتب القـــاف بالونّــة

والبال من ذكركم ماصام
واســأل فؤادي ومـا كنّه

@ رشيد بن سند :

شوقي لقاف الوفيّ قد حام
حـــول المــواويــل يتغـنــّه

تطــربــني بعــذب الأنـغـام
تقــتـل فـــؤادي وتحيــنّــه

# خالد بن سعيد :

يالله يـا ســاكـن الـدمــام
كيــف البشــر فيه مرتنّة

أسبوع إزحام ياهو زحام
الكل بالـ(ـمووون ) مفتنّة

@ رشيد بن سند :

يا ليته ازحام شيٍ هـــام
ما غير قـلّـة أدب مـنــه

زود الفلوس أضعف الإسلام
يــالله عسى دارنــا الجـنّـــة

# خالد بن سعيد :

في البــرّ والبحــر بالآثـــام
إبـليـس بس رنّ لـــه رنّة

احترت في الشرّ والإجرام
لا صار بعض الرضا منّه

@ رشيد بن سند :

الغرب يطلق عدو(ن) سام
والعــرب تشهـقــه وتكـنّـه

قلبي يظن حربنا الإعلام
وتــأكد اليـــوم لي ظـنّـه

أشكر أخي الشاعر رشيد بن سند على هذه المحاورة الجميلة

وانشاءالله تتكرر في أوقات أخرى

اخوكم

خالد الكثيري
بيــــاع الـــــــورد

رد يا حلم ! !!

مجرد فضفضة لا أقل . لا تركيز فيها , لذا لا تعاتبوني ان عرجت فيها



ياحلم .. آه ياحلم ,

هالحين فهمت اسمك

 فهمت انّك الحلم




اللي يجي مرة

.. ويغيب مرات






حلم وعساني ماتعلقت انا بحلم

بس ياحلاتك حلم مليان لذّات




ياحلم وين المشكلة .. كرر الفلم

خلني أصدق نفسي واسعد الذات

حاربت لجلك

وانت غادرت في سلْم



غنيت في حبي لك ارقى العبارات


 


ياحلم وين المشكلة . رد ياحلم


لاتترك مفارق خفوقك بآهات

مشاركتي في صحيفة العرب القطرية

أشكر صحيفة العرب القطرية على نشر مشاركتي التي تمت مع شعراء من الخليج

 

صفحة الشعر في جريدة العرب بإسم ( ملفى القصيد )



في كتابة قصيدة جماعية بإسم (( حكي كافر ) مشاركتي موضحة بالصورة الآتية :



وهذه هي المجاراة بالكامل

كانت في البداية من الشاعرة ( أنثى جموح ) ثم توالت مشاركات الشعراء تباعاً كالآتي :

أنثى جموح
ترى بعض الحكي كافر ولو كان الشعور إيمان
وانا ما ابدّل اشعوري إلى صار الحكي مجنون

محمد المناعي
بسجّل من بيوت الشعر ما يُنهي إلى الإدمان
واضع تحذير باشعاري : تراها أتأدّي لأحلى اجنون

سهام قاسم
وابكسر كل قصيد وحرف وارفع كفة الميزان
شراعي في الهوى كلمه تقود الخاطر المحزون
وببني من خيوط الشمس قصر يبهر الفنان
وحبٍّ عالي الموجه ابتردد واضح و موزون

عبدالله المرزوق
حبيبي جيت لك كلي حزن من عالم الاحزان
دخيلك لاتعاتبني« علامك » وش تبي ؟ وشلون ؟
أعرف اني نعم جيتك لأني عاشقٍ ولهان
معك بنسى بعض حزني « وقول اللي تقول » اتمون

حمدان اليامي
وُلِدْت اف هاذي الدنيا حزين وعشت حلم ازمان
لكنّه صار في عيني سراب وذاب وسط عيون
ياحلمي لاتعاودني دخليك ارحم التعبان
مادام إنّي صعب آحققك ارحل قبل يدرون

محمد العقيلي
حروف الشعر بردانة وشعوري الداخلي نيران
وانا محتار مابين السكوت وبوحي المغبون
اذا الأشعار ما تقدر توصّف ثاير البركان
أنا اعلنها حرام الشعر يقربني ولساني يكون

مهند الحمادي
لقيت ان الفرح حين و عرفت إنّ الحزن أحيان
حسافة كيف ما أفرح و انا اخبّي عشق مكنون ؟
عرفت ان الحزن عايش بقلب انسان و الف انسان
عرفت ان العشق موجود بس وين اللذي بيصون

سبيكة الشحي
يسار شوي ؟! .. لا ! و سط الحنايا .. تسكن الوجدان
خطر.. ما أموت من حبّك وفيني هالبشر يحكون
و كل اللي وصل منّك .. جروح ..! اتزّيّد الأشجان
كفاية ما وصل .. ارحل .. و يمكن هالجروح تهون ؟

خالد الكثيري
حسافة لو يحبونك نهاية حبهم نكران
وانا الي كنت في يوم بحياتك عاشق و مفتون
لأنك أرض مايثمر عليها الجود والإحسان
تركتك واوعدك جرحي ترا مهما برا ما ايهون

محمد آل مبارك
تركتك.. لا تجي فصحوة غلا وتقول انا عتبان
عليك .. وجيت ابين لك ..غلاك وافضح المدفون
تركتك.. للشتا .. غيمة ظما .. تمطر من الحرمان
وتنبت أرضنا منها..غلا..بس للأسف مطعون

رابط الصحيفة ( صفحة 23 )

http://www.alarab.com.qa/admin/pdf/files/606694852_NewsPaper1..pdf

وتقبلوا مودتي

- حالة تباهي -

وختمتها في مهرجان الجنادرية

-

حبٍ بدا فيني وانا غضّ الأطراف
………….. كل ماكبرت وكل مازاد فيني


قبــلة صلاتي شرّفـوها بإشـراف

………….. راح لفداها دمّي وموق عيني

كل الفكر لو حاول يقول بإنصاف

…………… مازاد غير اللي كتبت بيديني

وان قلت فيها ألف بيتن من القاف

……………. لا ماتوفيها ولا بعض دَيني

الديرة اللي بالشهادة والاعراف

……………. مجد تمادى فيني ومحتويني

بالشرق نفط(ن) للبلد خير نزّاف

…………… وبالغرب بيت الله يا ناشديني

في ظل ذاك اللي على الشعب صرّاف

………….. بومتعب اللي لا طريته تجيني

حالة فخر ماتنتهي فيها الأوصاف

…………… حالة تباهي ولاتباهيت ويني

الله يحـفـظ ديــرته عدّ ما طــاف

…………. مابين ركنه والحجر مسلميني

ويحفظ لنا بومتعب بعدّ من شاف

………. خيره من اللي حولي و حاسديني

أخوكم

خالد علي الكثيري

مو غريبة

 

مو غريبة لو تلاقي لك زرافة مو طويلة

أو تشوف القرد والكل ايتغنّى في جماله

 

أو تشوف البلبل يدوّر وظيفة في الوسيلة

أو تشوف التيس بالسوق ايتمشّى مع عياله

 

 

 

 

 

مو غريبة لوتشوف البغبغان يشيل شيلة

مو غريبة لو تلاقي فار بالع له غزالة

 

 

 

 

أو تلاقي هالأسد شعره مجدّلها جديلة

أو إذا العقرب تمرّن بالحديد بأي صالة

 

 

 

الغريب انك تشوف الشيخ هو شيخ القبيلة

لابدا عيّب وخوّن - استلم خيرة رجاله

! ! ! ! ! ! ! ! ! !

 

 

 

 

 

 

 

 

 

قصيدي

أخوكم

خالد الكثيري

 

 

 

 

 

-(( أتفرج ))-

- (( أتفرج )) -


أتخيــل أني ميّــت وأتفــــرّج ! !! ……. كيفهم بعد الفراق يتصرّفـون

كم يصمــد دمعهم أللي تدحـرج ……. هو سنة أو هوشهر أو ينقصـون ؟

هي ثــــــلاث أيـــام وآخرها تفـرّج ……. شوفهم في هالـعـزا يتضــاحكــون

والولــد أللي تحــرّيـــتـه يتـخــــرّج ……. كلها كم شهـــر ينسى من أكون

ضاع بعدي شاف هالدرب المعوّج……. لا دعــــالي , و انا ظنّي بينفـعــون

والحبـيبــة أم هــالعيــــن المدعّج ……. قل سنة , ويعود للكحـل العيون

لو لقت فرصة ومن بعــدي اتّزوّج ……. مــاتمانع , قالت : المــاضي يهون

بعدهـــا كل البـشــــر فيني تـلجلج ……. كم بقى من ماله ؟ الكل يبحثـون

في حســابه والخــزاين وبكل دُرْج ……. لاتصدق قول (غـارق في الديون)

يكـذب ويخفي حــلالٍ له توهّــج ……. خايف من العين, يا أيّة عيون ؟؟

ولـيـــن كلّو صـدّقــوا أني مهرّج ……. أضحك وفوقي مصايب ماتـهــون

ماجمعت من الحياة ماغير هالحجّ ……. والصلاة وصوم وصبري عالحزون

ثـم يمشي الـوقت لاقـبـري تسرّج ……. و المخــاليق الجـــدد مــايـذكـرون

هـذي الدنيا لها مدخــل ومخــرج ……. صالح الأعمال في الخرجة يصـون

أتفـــــرّج والله أني أتفـــــــــرّج ……. عــالحقيقة كلـّنـــــا فيهـــا نكــــون

أتخيّــل أني مـيــــت و اتفـــــــــرّج ……. من بعد فــرقاي كيف يتصــــرفون

كتب في 29 شعبان 1428هـ
القصيدة كانت لحظة استفاقة من حالة إعياء شديدة توقعت فيها الموت

وكفاكم الله الشر

اخوكم

بياع الوردخالد الكثيري

·٠•●♥ Ƹ̵̡Ӝ̵̨̄Ʒ ♥●•٠· في وداع صديق ·٠•●♥ Ƹ̵̡Ӝ̵̨̄Ʒ ♥●•٠·

هذي قصيدة في وداع أحد أعز أصدقائي بعد أن ترك العمل معنا وقام بتسليم سيارته كعادة أي إجراءات لخروج موظف , وبقيت هذه السيارة فترة أمام مدخل مقر العمل أشاهدها كل ماحضرت للدوام وأتذكره , بعد طول صداقة معه وزمالة ربت على الست سنوات عشنا كل لحظاتنا بأجمل مافيها .. قلت :

 سلام الله على الموتر على من كان سايقها
…………….. تركها واقفة عندي وانا شوفتها مابيها

تذكّرني صداقــة ماتلاقي من يعايــبـــها
…………… أخــوّة صافية في كل مظاهرها ومخابيها

وانا من يوم ما أقفى ونفسي هم صايبها
……………. أردّ الدمع في عيني وانــا مقدر أجافيها

تركني مع بقايــا ناس مختلفة مذاهبهــا
…………….أسايسهم وأنا عارف خواطرهم وخافيها

زمانن غادر , وبالحيل تلقى النفس صاحبها
…………..ويــوم أفرح بخلّي قال : أناماشي مخليّها

عسى ربي يوسّع له ويمطر له سحــايبها
…………..ويــرزقني صبر أيوب دامي مطولن فيـها

بتنسى صاحبك لاشفت هالفرحة وسبايبها
…………..وأبقى واحد من اللي في هالأعياد تهنّيها

وهذي دورة الأيــــام ماتقدر تـعـاتبـهــا
…………..تفرّقـنـا , تجمّـعنـا , لــزوم أنّا نماشيــها

واذا تدري ترى الدنيا جميلة في مصايبهـا
…………… تعلمنا كثير , وغير هالتعليم وش فيها ؟

وأكبر درس فيها أنهــا تفرّق حبــايبها
……………..وأحلى ما بها إمكان أنّا نلتـقي فـيهــا



كتبت في 11 رمضان 1428هـ
اخوكم
بياع الورد