اهتز غصني واجدبت بي عروقي
وتناثرت مع هبة الريح الاوراق
هجر الولايف ما طعني بخفوقي
كلي طعون بوقفتن كلها اوثاق
يا هيه ماهي بالمهانة طروقي
دنيا و حدّتني مع كل مطراق
لو هي حظوظي تب تجيني بذوقي
كاني وريث المجد من أوّل اشراق
خذني اذا ودك و داوي حروقي
لاصرت نا واياك تزيدها احراق؟
قدّر لذيذ ايامي وكل شوقي
ياكثر غيباتك وياكثر ماشتاق
رسمت من حبر الوفا كل طوقي
حتى الوفا صاير على الجيد خنّاق
قد طاب جرحي بس هذي شقوقي
تشهد على قصة (وفي) قابله (عاق)
كنت احسبك شمس وبتزهي شروقي
لا أشرقت شمسك ولا منك برّاق
شفها حقوقك ثم شفها حقوقي
منهو الذي قصّر ومنهو الذي فاق
أدري وثقت وباتحمّل وثوقي
الخيبة الي عذبت واحد اخلاق
أقصى انتقامي دمعتيني بموقي
واخر سواليف اللقا كانت افراق
كلماتي
خالد علي الكثيري
No comments:
Post a Comment