لا تدور شبيهك

يكفيك وجهك لا تدور شبيهك

.. انت الذي حسنك تمارو به الناس

حظ الجمال ان صابني منه فيحك

.. بس البلا هالناس ماخلو الناس

مزيونةٍ في حسنها ماتبيعك

.. مدعوجة العينين برموش حرّاس

لا شفتها يورق خريفك ربيعك

.. وجهن صبوح وجسمها جسم ميّاس

مبسم ليا بادي تبسّم يبيعك

.. خدّن تورّد كنه التوت في كاس

وخصرن يعاندها وكنّه يطيعك

.. في ميلته ميّلتْ لعيونه الراس

تبرا بها علّة متيّم بطيفك

.. تكفين ي بنيّة ترا زاد بي باس

ما اتفقنا ع الوعد

اتفقنا ع المكان , وما اتفقنا ع الوعد

بس أنا جيتك من الشوق الذي قد صابني

وش تقول بواحدن بكّر من الشوق و قعد

عند بابك ساعتين وياكثر من لامني

الخطا ماهوب من صوبك ايا وجه السعد

الخطا من لوعة القلب الذي قد شاقني

قلت ابحسبها مسافاتي وامتّرها و اعدّ

واختصر كل الذي في درب خلّي عاقني

سامح الله الزمن لاشال خلّك وابتعد

وان يجيبه أشغله عنّي ولاهو شافني

وسامح الله البروق الي تسابقها رعد

لا تظللت السحاب ولامطرها صابني

كلماتي

خالد علي الكثيري

الليل والهاجوس

الليل و الهاجوس و البر و الكيف

و يدين ملّت من ايادي بني الناس

أنثر حطوب السمر جمرن مراهيف

وانسى وانا قدامها لوعة الباس

عوذة من الي باقي ومابعد شيف

دام الذي قد راح ما طيّب الراس

طاحت بي اطعون الرماح المراديف

طيحة صقاقيرن على طير قرناس

كثر التعلّي ما ضوا بالمشاريف

وكثر التمادي في الخطا درب الانجاس

وكثر التجاهل فرّقت بالمواليف 

وكثر البخل لا جا على قومن خساس

وكثر التباهي لا امتلا وقتنا زيف

وكثر القطاعة بين هالراس والراس

تقبع بك الدنيا بليّات تخفيف

ترمي على آمالنا طعنة الياس

ودموعنا مما حداها مذاريف

والعين في ليل العنا مابها نعاس

أقدارنا ياهي علينا تصاريف

ترمي على الصافي حصاها ويحتاس

طحنا و لكن طيحة الرمح والسيف

لا طاح يطعن راسه بكل مغراس

يالله انت الظل من قايل الصيف

وانت الضيا لا أعتم الدرب هوجاس

ماعاد فيني آه أو ليت أو حيف

ماعاد فيني اضرب اخماس باسداس

دنيا على ما قيل دنيا تكاليف

والناس فيها كل واحد بمقياس

من عقب كسر القلب كسر المجاديف

ومن عقب ماحسيت به مات الاحساس

صرنا على ماقيل نقضي سواليف

والا تراها قلوبنا صارت اخراس

النفس طابت من وجيه المكاليف

واشتاقت لجمرن حواليه جلّاس

كلماتي

خالد علي الكثيري

19رمضان 1439هـ

طاح القمر

طاح  القمر من صفحة الليل نوره

واستاحشت كل الليالي بلا نور

واتذكّر اني محتفظ له بصورة

كني بشوفة صورته عايش الدور

واسقي من عيون الوله في حضوره

وانبت على بروازها ورد وزهور

واكتب من شفاه المحاني عبوره

في داخلي مرّت ولامثله عبور

والدفتر الي امتلا في سطوره

كل الحكي فيه اعترافات مسحور

وارسم على ذاك الجبين وغروره

قصة تخايل أتعبت كل مغرور

وارفع سحاب الشك وامحي ظهوره

واهل عبراتي مع الدمع ممطور

واشقى على وقتٍ تعدى بجوره

يمشي بك امواج ومسافات وبحور

ما وقّف لغالي ولاطاع شوره

ولاسمح لاشواقي بساعة حضور

طاح القمر , من طاحت علوم نوره

حتى القمر ياصاحبي طاح مقهور

كلماتي

خالد علي الكثيري

والله كثيرة

شفني عطيتك من دفا قلبي عمر

وانت الذي من قسوتك ما تحاييت

خلّيتني ياصاحبي قصة هجر

لاني بحيٍّ في رجاكم ولا مِيت

والا الجبر في هالزمن مامن جبر

محدن درا بك وين ما رحت أو جيت

ألي على دافي البقا ملّ الصبر

والي على فرقاك مافكّر ابـ ليت

يعني ولوتسمح ولا لك أي أمر

اجرح وامسح دمعتي لامن ابكيت

قسوة تعامل فوقها قسوة نظر

والله كثيرة تجتمع لا تباليت 

الله يجبر هالكسر وايّا الكسر

ويلملم جروح الذي بدمعه يبيت

غصّت حروفي والمعاني تنتحر

لا صار قلب اللي قسا بك هو (البيت)

بقلمي

خالد الكثيري

فزيت من نومي

فزّيت من نومي ، أثاريك مرّيت ؟

اثرك تمرّ .. وقلبي ايقول إصحه؟

حسيت في قربك عسى انت حسيّت

و الا فرحت بمثل ما بيّ فرحه ؟

كثر الغلا ناداك ، بس انت ماجيت

وكثر الوسع في خاطري قلت مرحه

وكثر اشتياقي اسألك وانت عيّيت

مدري عسى باقي لنا دروب سمحه

الخاطر الي فزّ لك داخل البيت

وانت الذي مرّيت في ظرف لمحه

هذا ترا قلبي وانا ما تعافيت

أبطي وما أنسى حلاته وملحه

من غابت علومك وانا ما تغافيت

اصبحت في سرحة وامسي بسرحه

قلبي درا بك شوفني شلون فزّيت

فزة قطاتن نامت بـ غصن طلحة

كل البلا .. لا خالفتني المواقيت

ليت الصدف تهديك في يوم منحة

واشوفه محياك واقول ياريت

لحظة لقانا مابها أي مزحه

كلماتي

خالد علي الكثيري

20مارس2018م

لحظة عطا

لا خذلني الجود في لحظة عطا

قمت ادور في دواليبي القديمة

شي يسبق بي ليا حظّي بطا

وشي يسهيني عن الحال السقيمة

التواضع بالهدايا مو خطا

الخطا لاشحّت النفس الكريمة

يافدا الي له من العزوة غطا

لا تناصته الرقاب المستهيمة

فز لك فزة جواميع القطا

وانتفض كنه غريمك هو غريمه

يبتعد بك عن منازيل الوطا

ويرتقي بك في منابير العزيمة

ذاك ذاك الي على قلبي سطا

ريتني في يوم مثله أو نديمه

ياعسى ربي يبارك في خطا

اليدين الي بها قلوبن رحيمة

كلماتي

خالد علي الكثيري

13/2/2018