البشر ماعادها ذيك البشر

الغموض الي على الدنيا يزيد

والبشر ماعادها ذيك البشر

يرحم الله الزمن ذاك البعيد

ويرحم الله ناسه الي بالصور

مابكت عيني على قل العضيد

كثر ماتبكي عزيزن لا انكسر

رايتي لارفرفت في يوم عيد

نكّسوها حاسديني بالحجر

ما ذبحني جارحيني بالوريد

غير ذاك الي تغافلني غدر

طعنة الي تامنه لا جا يكيد

استباحت فرحتي طول الدهر

والدفا لاقد تحاواه الجليد

ماتلاحقها بوقّاد الجمر

جفت علومي على حبل الوريد

ماسقاها في شراييني عمر

وان سقاها شوفني منها زهيد

من سوايا ناس تبطي بالحدر

-

خالد علي الكثيري

4/2/2018

انت ماجربت بالصدفة شعور ؟

انت ماجربت بالصدفة شعور

يوم ماتدري وش الي تكتبه

تفتح الدفتر ثم تبدا وتخور

تختفي كل المعاني المطربة

هاجسي ماحاد عن ذيك السطور

حاضرة كل المعاني الغايبة

ابتدي. و اكتب عن غيابك حضور

وامسح بدمعي حروفي المتعبة

وانسج احلامي على غصن الزهور

والزهور على الغصن متضاربة 

والقمر لابان .. بان ابدون نور 

والنجوم تشوفها متكركبة

وابتسامات البشر فيها شرور

والوجيه الطيبة مو طيبة

هكذا ياصاحبي جاني شعور

يوم ماتدري وش الي تكتبه

خالد الكثيري

7-1-2017

خذني معك ياطير

ياطير يلّي في السما راح عالي 
خذني معك ياطير لاصرت بتروح
//
اقسم بربي وحده ذو الجلالِ
ماعاد لي بارض البشر شي مملوح

//
ابطت علينا مظلمات الليالي
ما اشرقت لي شمس أو نورها يلوح
//
وش عادلي ياطير والثوب بالي 
والحال حال الصيد لاصار مطروح
//
والغالي اليّ ظنتي دوم غالي 
باع الغلا لاصار له شي مصلوح
//
يالله ترحمني على ما جرالي 
حالي تعيب و داخل القلب مجروح 💔

خالد الكثيري

3فبراير2018م

الله

وتكاثرت في داخلي ال (أللهُ )

ربّي تقدّس ثم جلّ علاهُ

مالي بخلقك يا ءالهيَ رغبةٌ

جُد لي فإنّي عبدك الأوّاهُ

واغفر ذنوبي يا ءالهي إنّني

وجّهت وجهيَ والخلائقُ تاهوا

رحماك يا الله قد زاد العنا

وأنا على رجواكَ يا أللهُ

من لي إذا ضاقت عليّ جوانحي

من لي ءِالهٌ أرتجيه سواه ؟

يا خالقي يا راحمي يا رازقي

ياربِّ , يا ألله , يا أللهُ

ترانيم دينيّة 

كلماتي

خالد الكثيري

أغراض عاشق

جيتك وانا فيني من الشوق لهفة

لاتقتل اللهفة ، ولا تقتل الشوق

جيتك ادور من شفاياك وصفة

فيني ألم وعلاجها قالو الذوق

مانيب طمّاع ، وترا هي رشفة

رشفة وانا من بعدها حِلف لاروق

تدري صمودي لا بغا منك وقفة

يعني يبيك تردّ له شي مسروق

قلبه وعينه عقله وكل نزفه

(أغراض عاشق) ضاعت (بقلب معشوق)

واذكر دقايق بيننا حيل ترفة

ساق الهوى ارواحنا كيفما يسوق

حتى منامي لا بديت انت صدفة

ان جيت اتحلّمك .. ماودي آفوق

أطرافي الي صابها منك رجفة

وعيوني الي حارت بداخل الموق

تذكر زمانك يا عسى الله لطفه

وتحوفها من كثرة اشواقي حروق

جيتك أبي من برد الأيام ادفه

جفّت حروفي ، وانكسر كل منطوق

وسلامتكم

خالد الكثيري

مات فيني كل شي

مات فيني كل شيّ 

وش بقى ودّك يموت

كل ماقد كان فَيّ

أحرقه طول السكوت

كنت في دنياك ضيّ

صابه بصمتك خفوت

ضاقت الدنيا عليّ

اه يا ضيم البيوت

لو تداريني شويّ

لو تسمّعنيه صوت

ماتت حروف الحكي

قولهاحبك وفوت

غِشّها من دفتري

الحكي أحيان قوت

صح تبني بس هي

مثل بيت العنكبوت 

كلمتين ولاتجي

اسقها ذيك النبوت

ويش يالقاسي تبي

بعد هذا الموت موت ؟

كلماتي

خالد الكثيري

6/12/2017

ردود شعرية مع الشاعر محمد بن طالب

ردود شعرية 

ردود شعرية قديمة , بيني وبين الشاعر الكبير 
محمد منصور بن طالب 
حيث تحرّشت به وارسلت له اولاً مبادرتي 
وكان هذا الحوار الشعري الجميل :





خالد الكثيري:
ناديت وينك أبومنصور ياويلك
ولّم رجالك تراني جيت برجالي

جيتك وشفني تراني جد ّفاضي لك
عطنا قصيدك اذا تقدر على نزالي


محمد بن طالب:
لبيت كلي وقافي جاك يمشيلك
ماادمت رايق وهذا الوضع يحلالي

تقول فاضي وتحسب ماني فاضيلك؟؟
قرب قدوعك وانا باقرب دلالي



خالد الكثيري:
يازينها دلة(ن) فاحت على هيلك
من طيبها ماتوقّف هزّ فنجالي

تسحن على بنّها فرسانك وخيلك
في مجلسن ذاك غالي ثم ذا غالي

محمد بن طالب:
يا مرحبا بك عدد ما يبرق مخيلك
على القوافي ويضوي (ربعها الخالي)

شعرن كتبته على طاروق تفعيلك
فيه التحدي وفيه الحرف متعالي

خالد الكثيري:
زيِد التعالي وانا بازيد باشيلك
نرقى الطويلات محمولن وحمّالي

ترا الثريا ثريّاي ولك سهيلك
أما البدر اختصاصك يامنى حالي 

محمد بن طالب:
ياحليل ردك علي وانت يا حليلك
جبت المفيد وضربت المر بالحالي

ياولد عمي ترى هالقلب صافيلك
تعال واسمع قصيدي ولحن موالي


خالد الكثيري:
قالوا العواذل ترا كثّرت مدحي لك
 لا مادرو قدرك بمليون رجّالي

شاعر تغني لك الأيام وتبكي لك
بالقاهرة صفقو لك والبدر عالي

خوفي اذا جبت (اتلحلح) بـ (شدحيلك)
وتعيّر الكبسة وتمدح بفوّالي

لا الأرض أرضك ولاذا النيل هو نيلك
 لاتحسب البنطلون بمستوى عقالي


محمد بن طالب:
طول غيابي وابيك تشييك ايميلك
ارسلتلك شين يبرد خاطري وبالي

بالمختصر اقرا وقرب منك منديلك
لانك بتبكي وتردد ليل يا لالي


خالد الكثيري:
مرسالك اللي تأخر من غرابيلك
لا انت اللي أرسلته ولاهو لي جالي

الظاهر انك مصدق اني باكي لك ؟
ببكي إذا قد بكى بوزيد لهلالي ! !! 


محمد بن طالب:
اليوم ياصاحبي بحكي و بـشكيلك
بسًمعك حاجه واحكم عقبها تالي

واحد تعزه وتصفاله ولا صفيلك
قلي شسوي فقدت المر والحالي


خالد الكثيري:
حتى لو انه صفا , هو صدق صافي لك ؟
 هذا زمان المصالح يابري حالي 

خليتهم كلهم , ماعاد بحكي لك
 قصّيت مفتاح قلبي وسط ميدالي 



من روائع عام 2009م