محاورة بين الكويت والرياض

أخي الشاعر فواز نايف الدواجنه الكثيري اللامي - من الكويت

قام بطرح بيت شعر ودخلت معه في محاورة لطيفة 

وأحببت نشرها لكم ..


فواز نايف الكثيري :

لاعاد تاتيني ولا عــاد أباتيك // يعني من الآخر : سلامووو عليكم!


خالد علي الكثيري :

جيتك بلا خطة ولابي تكتيك // وان ماتباني حيل حنّا نبيكم


فواز نايف الكثيري :

يامرحبا ترحيبة البيك للبيك // لا والله الا جعلنا نفتديكم


خالد علي الكثيري :

جعل الصباح اللي تبدّا بطاريك // كله سعادة والغنايم تجيكم


فواز نايف الكثيري :

خابرك يارجال ماتظرب بريك // للطيب طَيّب ، مير راحت عليكم


خالد علي الكثيري :

ماراحت , إلا في قفصها كما ديك // صاح بصباحه ماحدن قام فيكم 


فواز نايف الكثيري :

هذي لها وجهينٍ الله يهديك // أفطن لها ياجعلنا نفتديكم


خالد علي الكثيري :

فاطن لها ومشيّك الوضع تشييك // وادعيت ربي ياعسى نلتقيكم


فواز نايف الكثيري :

بانت سعاد ، وبان معها بناخيك // وأنا لكم ياولد عمي وأليكم



---------

أشكر الأخ فواز الكثيري على هذه المحاورة الجميلة 

تحياتي له ولأهل الكويت


حدث في 2011م

أحبك - أحبك - أحبك

آه يــا ذيك الليـــالي يوم قـلـبي يـم قلبك
........... كل شيٍّ مع خفوقي كـان يقول أني أحبـك
كن في ريح النسايم شي من ريحة عطــورك
......... كن في صوت الخلايق شي من كلمة أحبـك
والصباح إليا تشعشع منـك يـازيــن المحيّا
............. والطيـور اللي تغرّد مـا تقول إلا أحبـك
أنت بستان المحبة ريح وردك من عطــورك
............. أنت موسوعة بكل صفحاتها كلمة أحبـك
ماكـأن الغـابة وكـل الوحوش اللي عليهـا
............. يقربــوني بـأي أذيّــة لا درو أني أحبـك
أنهبل ساعات لاغابت طيوفك عن عيوني
......... وأرجع أصحى لابدا زولك لأني موت أحبـك
ع الغدا ولا على سفرة عشاي أقعد أفكر
............ وقبل آكل قد شبعت وهذا من بادي أحبـك
انت وش سويّت فيني أمشي في الشارع أهذري
.............. أيه أحبك أيه أحبك والله أني أيه أحبـك
مدري لو تشرق علينا الشمس في دنيا بلاكم
........ مدري لو أقدر أعيش لو آنا أصلاً ما أحبـك
صار فيني حالةٍ لاشيخ لاساحر ولا حتى
.............. طبيب القلب يوصفلي دوا لحالة أحبـك
شوف حتى في قصيدي جاتها عدوى غرورك
................ مقدر أختم كل بيتٍ فيه إلا بيا أحبـك

من أقدم قصائدي

كتبت في 2008م

ذبول الورد

ذبول الورد في حضرة ~ حبيبي شي معتاده

....... ترا من زين محبوبي ~ نكس وردي له الأعناق

عساني منحرم منه ~ هذاك الزين بزياده

...... تحدّر في حسن , خلّا ~ جميع الخلق له عشّاق

واذا غاب القمر شفني ~ مثل من ضاع له زاده

......... وكيف ابقى دقايق في ~ غيابه دونما أشتاق

انا ما نامت عيوني ~ وكل الناس رقّاده

........ وقلبي لا نـوا شـــوفه ~ يبيّتها وهـــو خفّاق

فديته لا دعا للسلم ~ فيه الحرب وقّاده

......... فديته لامشى مشي ٍ ~ عيون الناس له حدّاق

وأحلى مايعذبني ~ عناده آه يا عناده

......... ونا أدري بأنه منـ ~ ـتهي في داخـله خقــاق

سبا قلبي وخلاني ~ اذوق الهجر وبعاده

......... وانا كليّ صبر إلا ~ إذا تلعب بي الأشواق

وصارت قصتي قصة ~ عبيد الحِسن واسياده

......... ولو غمَضتها عيني ~ ابمشي له وانا منساق

ولو غمَضتها عيني

ابمشي له 
وانا منساق ..

أخوكم

خالد علي الكثيري

29 يناير 2012م

بعض المصايب

بعض المصايب لو تقدَّر تصيبك شدّت عزومك وبسببها اتعلّم وبعض المصايب من بعيد وتريبك وان صابتك زين ان قدرت اتكلّم وبعض المصايب ماتجي بس تجيبك وان جابتك حاول عساك اتبسمّ وأكبر مصيبة لا بدت من قريبك هذا الذي قلبي عليه يتألّم يتغافلك رحم(ن) ويبدا بطيبك والقرصة اللي من قريبك بها (سمّ) !! ياخاطري شابت علومي بشيبك حتى الكلام ان قمت اقوله تلعثم العيب ياقلبي ترا موب عيبك والجرح ماله بعد ماصار .. يلتم هذي جروحي لايجيها طبيبك أحيان افضل للجروح التندم يالله يالعالم تراني طليبك تسعد حياتي يا ءالهي وترحم محبكم خالد علي الكثيري

فكرت أعتذر

اي نعم غلطان فكرت اعتذر
بس انا وش لي في هذي العلاقة

كل ما حاولت ارقى أنحدر
هي علاقتنا ترا فيها إعاقة

ليلها عتمة ومافيها بدر
والصباح ألي تأخر في عناقه

والكلام الي وما مرّ الصدر
ياترى بيعيش لو بِسم الصداقة؟

حالة الميت وفي حضن القبر
حالة المخنوق لازاد اختناقه 

جاتني غلطة على كف القدر
كنها رحمة تبي مني انطلاقه

قلت اروح ولا افكر بالعذر
والعذر احيان يتعبني وثاقه

والقطيعة في بعض حاله.. أجر
لا استحال الحب واتفكك نطاقه

خلها تلعنك وتزيد الهجر
بالأخير وخلها تنهي العلاقة !!

كلماتي 

خالد علي الكثيري

19/7/2016م

لا تملّ من الكلام

لا تملّ من الكلام انت ماشفت اشتياقي
... كثر ما أسأل عليك , لا تأخرها الإجابة

هو صحيح الإحترام في العلاقة شي راقي
... بس انا فيني وله , واصل لحدّ الصبابة

شوفني كلّي اهتمام ما التفتّ لإحتراقي؟
... بادل الشوق الندي , واقبل الحب وعتابه

القلوب وماتنام من لظا حرّ التلاقي
... وانت قد نمت ونسيت الغلا مفتوح بابه

ليتك تشوف الهيام وش يسوي في وثاقي
... ليتك تشوف انتظاري لا كواني بإلتهابه

مايكفّيني "تمام" خلهّا علومك سواقي
... مايداويني "هلا" لاتحاوتها الرتابة

ودي بقصة غرام في نهايتها عناقي
... ودي بلحظة غلا , ماتجاريها الكتابة

أو على الدنيا السلام مابها أحدن وباقي
... هي علاقتنا ترى من بدايتها غرابة


من جديد قصائدي 

خالد الكثيري
6/7/1437هـ

اترك مخاويك وابدا خاوي اذيابه

وصية الى  .. ( إبني )

اترك مخاويك وابدا خاوي اذيابه

              لاما يعاديك من شافك مخاوي ذيب

احزام لك في دواهي وقتن تعابه

              هي من شبابك وتبقى لك إلين تشيب

كل الوجوه اللي في وقتك ترا اتشابه

              واحذر تماشي معيبّ لايجيك العيب

وان كان لك حق امشي له ولا تابه

              إن جاك بالطيب والا مانباه الطيب!

والصاحب اللي ترك اهله وأصحابه

              مصيره ايردّ  لوماه إبتعد ويغيب

القرم ماهوب واحدْ فاتل اشنابه

              القرم ذاك اللـ حط عينه فـ عين الذيب

ويفزّ لا من خويه عاثرن نابه

              ويرد شمسن لمشرقها قبل لاتغيب

ويظّل ربعه لحرّ الشمس واللابة

              يسرّ ذاك , يفزع له , يحط , يجيب

هذا الخوي .. ياسنا هالقلب واطنابه

              هذي سلومك تربّاها عسى ماتخيب

خلك سنايد وخل النار شبّابة

              خله يقولون باقي في الزمن ترحيب

عساني ان قيل ذاك اتوسّد اترابه

              ما مات خالد لأنّه جايبن له ذيب

وسلامتكم ,,

خالد الكثيري